Raid “familiarra”

2019ko maiatzak 25ean Debabarrenako III. Raid “familiarra” jokatuko da. Deban hasi eta amaituko da proba.

Raida orientazio proba bat izanda, antolakuntzak proba hasi eta berehala mapak banatuko ditu. Mapa horietan hainbat leku egongo dira adierazita eta partehartzaileak leku horietara iristen saiatuko dira, nahi duten ordenetan eta nahi duten bidetik. Markatutako leku bakoitzak puntu bat edo gehiago eman dezake eta helburua, ahalik eta puntu gehien jasotzea da. Horretarako, 2 orduko denbora tartea emango da. Proba oinez edo korrika txikian egin ahalko da. Tartean, joko eta proba bereziak egongo dira.

Proba goizeko 11etan hasiko da, baina 10:30etan Debako alamedako musika kioskoan egotea komeni da azalpenak orduan emango baitira.

Gutxienez 2 eta gehienez 5 lagunez osatuko dira taldeetan parte hartu ahal izango da.

INFORMAZIO TEKNIKOA

  • Distantzia: 7,5km
  • Desnibela: (+-) 270m
  • Proba burutzeko ematen den denbora: 2 ordu.

8 baliza eta 3 proba berezi egongo dira ibilbide osoan zehar.  8 baliza eta proba bereziak aukerakoak dira, hau da, ez da derrigorrez pasatu beharko guztietatik. Hori dela eta, oso erraz moztu ahalko da ibilbidea eta talde bakoitzak bere neurrira egin ahalko du proba. Jarraian, proba berezien inguruko informazio zehatza.

Proba berezia 1 (PB1): Hondartzan jokoa

Proba honetan ibilide zuzen bat egongo da, luzeera eta zabalera jakin bat eukiko duena. Ibilbideko punturik urrunenean makil bat egongo da. Hasiera puntutik, bertara joan eta makil horri, burua gerriko alturan eukita, 10 buelta eman beharko zaizkio. Ondoren, ibilbidetik irten gabe, berriro hasiera puntura bueltatu beharko da. Probako puntuak eskuratuko dituzte denbora jakin batetik behera eta ibilbidetik irten gabe egiten duten taldeek. Partehartzaile guztiek egin beharko dute proba.

Ikus ondorengo bideoa probaren nundik norakoa hobeto ulertzeko:

https://www.youtube.com/watch?v=Oo0Ruu-ZH4A

Proba berezia 2 (PB2): Slackline

Taldeko haur guztiek distantzia jakin bat egin beharko dute sokaren gainean. Nagusiek lagundu ahalko diete. Distantzia jakin hori egonda, probako puntuak eskuratuko dira.

Proba berezia 3 (PB3): Micro-orientazio jokoa

Distantzia oso motzean egingo beharko den orientazio joko bat da.

40 kono egongo dira eta kono bakoitzak zenbaki bat eukiko du. Antolakuntzak 4 ibilbide ezberdin prestatu ditu eta ibilbide bakoitzak, 8 kono ezberdinetatik pasatzeko orden konkretu bat adieraziko du. Partehartzaileek, kono horietatik pasa eta zenbakien batura egin beharko dute eta antolatzaileei emaitza esan.

Emaitza ondo eman ezkero, probako puntuak eskuratuko dira.

Advertisements